مصدوم في ندى

مصدوم في ندى

قلتي ليّ سموك ندى!؟!

وده منو السمّاك ندى؟

ده أكيد أبوك

إنعل كِدة!

فيك شنو يسمّك ندى!؟

في صوتك أتخن مننا

إضنين كُبار زي دِشّنا

وتقولي ليّ سمّاك ندى!

خشمك ده ريحتو معفّنة

ايدين كبار حقات بُنا

وتقولي لي سمّاك ندى!؟

المشية كتّاحة وعلال

كرشك تقول شايل جَنى

وتقولي لي سمّاك ندى!؟

قالت لي "ها هدى في البطاقة إسمي ندى"

شوف يا أخ..

مافيش علاقة بينك وبين ندى

خلّيها ندى ..

خالت قريبة جارت صديقة ناس ندى

ما فيش علاقة

ندى في العيون أكحل مجعّد مسوّدة

انتي العيون فوقن قضى

ندى في الحواجب زي هلال

قصة نصوم دي مؤكدة!

انتي الحواجب دلجة بس

قلم الحواجب هاردا

وتقولي لي سمّاك ندى!؟

ندى تبتسم آلالاف مؤلفة تسعدا

وانتي الخشم شارّة التلاليش

بس طبق ومغطّي صينية الغدا

ندى في الوشيش نظرك بشيش..

ما يعقّدا

وانتي الوشيش وش الجحيش

نخرين كُبار كُرعين ردا

وتقولي سمّاك ندى!

قاتلي "آي أنا إسمي ندى"

شوفي أوعك تقولي اسمك ندى

ندى ما بس الاسم

ندى الجمال زايد الأدب زايد العلم زايد الفهم

ندى في الجمال ما شُفنا أجمل من كِده

ندى في الدلال خصّاها بيو رب العباد حين أوجدها

ندى في الأدب ..

ربّوها بيو رجال ياكلو النار مولّعة موقدة

ندى في الكلام

طبيعي صوتا بيجيب صدى

ندى في "البزاغ" ..

شربتي "سفن أب" ياهو ده !

وتقولي لي سمّاك ندى!

ياشينه ياقرد الطلح؟؟

كل ما اقول للناس كلام

الناس تقول .. لا ما كده

كل ما اقص لى بنطلون

يطلع قصير ذى الرداء

وكل ما اقول جبتا النجاح

تطلع شهاده مقدده

اه يا مغص .. اه يا آلم..اه يا ندى

ما ده الزمان كاسر قلوبنا وهاردا

ادينا ياخ جرعة حنان

حقنة آمل

كبسوله بسمه وغروده

وانا ما حكايتى معقده

بتعشى ديمه مع الصباح

باكل الفطور بعد الغدا

فى يوم مشيت جنب البنات

من نوع شهيره وشهرذاد

حاجات...كده

وظهرت ندى

ملكة جمال متفرده

قالت لى وين يا حدب

كيفك كدا

كيفى كدا

الحقنى عوك يا مرتضى

اخوك اعصابه بايظه وهامده

زى شنان وكت كندوره مزق ليك

شباكه وقدده

مريخ عديل حاكه المورده

قلتا ليها شوفى يا بت الحلال

دفترى حابى دفاترك ورايدا

وحلف يتقرى عمل الحكايه معانده

وشبشبى حلف ما يمشى خطوه ولاقدم

إلا يشوف كعب عاليك ده

وقميصى حابى بلوزتك الحلاتا مورده

وشوفيه من كتر البكاء

كيفن اكمامه بايظه مهرده

وجريونا حابى جريوتكم شدييييد

فى الحله من دون الجريوات رايده

قلتا ليهو شينه ومقرده

حلف يقتنع عمل الحكايه مكايده

وانا ذاااتى يا ريحانه يا متفرده

احوالى كعبه منكده

يا ام تحبينى واموت

والروح وراك مستشهده

يا ام تشوكشينى واموت

ووصيتى واحده محدده

قبل الدفن والفاتحه

ديك ما يقروا تشهدا

يكتبوا فى قبرى

بى خط عرييييض

فى لافته فووق

وااي يا ندى

سجمي خالص وووب علّي جدا